O Toggie Volstruis !

As jy nog nie volstruisvleis op die braaier beproef het nie, was jou kop in die sand. Ons het van naderby ondersoek hoe om hierdie heerlike maer vleis perfek te braai en ʼn paar interessante geurkinkels en -voorstelle bygevoeg vir bygeregte wat perfek daarby pas. Geniet dit!

WAAROM EN HOE?

Volstruisvleis is uiters maer, wat ongelukkig tot die algemene aanname gelei het dat dit taai is. Dit is egter nie die geval nie! Dis verrassend sag en sappig, en as dit goed gaargemaak is, kan dit letterlik in jou mond smelt.

Volstruisvleis smaak meer na beesvleis as na pluimvee en hou talle gesondheidsvoordele in. Dit het min kalorieë, cholesterol en vet, maar bevat steeds baie yster en proteïen.

Vanweë sy lae vetinhoud kan volstruisvleis droog wees as dit te lank gekook word. Vir ʼn vinnige en maklike onfeilbare kookmetode stel ons voor dat dit met olyfolie bedruip word, aan alle kante oor warm kole verbruin en met smaakmiddels besprinkel word sodra dit geseël is.

VOEG ‘N MARINADE BY  

Klink bogenoemde ʼn bietjie te gewoon en vervelig vir jou? Wat dan van ʼn unieke kinkel bysit deur ʼn heerlike, geurige marinade by te voeg? Hier gaan ons:

1. Berei die marinade voor: Jy kan ʼn soet en pikante braaimarinade maak met bestanddele soos tamatiesous, bruinsuiker, worcestersous, asyn en speserye. Anders kan ʼn terijaki-styl-marinade met sojasous, heuning, knoffel, gemmer en sesamolie ʼn Asiaties-geïnspireerde kinkel gee. ʼn Sitrusmarinade is ook heerlik! Gebruik vars sitrussap – soos lemoen, suurlemoen of lemmetjie – gemeng met olyfolie, gekapte kruie soos pietersielie of tiemie, sout en peper. Jy kan ook ʼn bietjie heuning of esdoringstroop byvoeg vir soetheid.
2. Marineer en braai: Marineer die volstruisvleis in jou gekose sous minstens 30 minute, of oornag indien moontlik, om die geure toe te laat om werklik in die vleis in te trek. Braai dan die gemarineerde vleis soos hierbo voorgestel word – na jou smaak. 
3. Bedruip met marinade: Terwyl jy braai, bedruip die vleis met die oorblywende marinade om dit klam te hou en met ekstra geur te deurtrek. Hou aan om die vleis te deurtrek namate dit gaar word en draai dit van tyd tot tyd om om seker te maak dis egalig bedek.
4. Rond af en sit voor: Sodra die volstruisvleis na jou smaak gaar is, haal van die braaier af en laat rus ʼn paar minute. Sit die vleis warm voor met vars kruie of sesamsaad gegarneer vir meer flair.  

Betroubaar gebruiksklaar

Jimmy’s Sauces het ʼn reeks marinades en souse wat iets besonders van gewone braaivleis maak. Hierdie Smokey Barbeque Sauce gee diepte aan volstruisvleis en kan gebruik word om te marineer, te bedruip en af te rond om daaraan ʼn tikkie rokerige soet, ryk geur te gee. ʼn Reeks souse, waaronder peri-peri, steakhouse, soetrissie, shisanyama, pepersouse, hoendermarinade en pikante sous (relish) is in kleinhandelwinkels en aanlyn te kry.

www.jimmysauces.co.za

Die byvoeging van ʼn geurige marinade by jou gebraaide volstruisvleis sal jou gaste beïndruk. Eksperimenteer met verskillende resepte en geure om jou gunstelingkombinasie te kry!

WAT OM DAARMEE SAAM VOOR TE SIT?

Dis belangrik om bygeregte by by jou gebraaide volstruisvleis te sit wat dit afrond. Ons het ʼn paar idees vir jou: 

Geroosterde groente: Deur groente saam met die volstruisvleis te rooster, is ʼn uitstekende manier om varsheid en tekstuur aan die maaltyd te gee. Oorweeg dit om die volgende op die braaier te sit: soetrissies, vingerskorsies, eiervrug, aspersies en kersietamaties – wat met olyfolie geborsel en met sout en peper gegeur is.

Groenmielies: Geroosterde groenmielies is ‘n klassieke bygereg wat goed saamgaan met gebraaide vleissoorte. Borsel die mielies met gesmelte botter en strooi en paprika oor voor braai.

Gebraaide aartappelslaai: Maak in plaas van gewone aartappelslaai ʼn gebraaide weergawe deur klein aartappeltjies halfgaar te kook, dan in die helfte deur te sny en te braai tot hulle goud van kleur en bros is. Meng hulle met ʼn vinaigrette-sous wat met olyfolie, Dijon-mosterd, rooiwynasyn en vars kruie – soos pietersielie en grasui – gemaak is.

Koolslaai ‘n Verfrissende koolslaai van gesnipperde kool, wortels en rooiui wat met ‘n romerige sous gemeng is, is die perfekte bygereg by geroosterde volstruisvleis. Maak jou eie sous met mayonnaise appelwynasyn, suiker en selderysaad.

Geroosterde brood of platbrood: Sit geroosterde brood of platbrood saam met die volstruisvleis voor om die sappe op te suig en vir ʼn lekker krakerigheid. Borsel snye brood of platbrood met olyfolie en braai tot liggies geskroei.

Caprese-slaai: ‘n Eenvoudige caprese-slaai wat met vars tamaties, mozzarellakaas en basiliekruid gemaak en met balsemieke glanssous bedruip is, is ‘n ligte en verfrissende bygereg wat die rykheid van geroosterde volstruisvleis afrond.

Quinoa- slaai: ‘n Quinoa-slaai propvol gekapte groente soos komkommer, soetrissie en avokado wat mey ‘n sitrusvinaigrette gemeng is, is ‘n voedsame en heerlike bygereg wat goed saamgaan met geroosterde volstruisvleis.

As jy iets heeltemal anders wil hê, is hier ʼn paar ander idees om volstruisvleis op die braaier soveel lekkerder te maak!

ANDER VOLSTRUISIDEES:

Volstruissosaties 

Sny volstruisvleis in blokkies en marineer dit in jou gunstelingmengsel van speserye en kruie wat met olyfolie of jogurt gemeng is. Ryg die gemarineerde vleisblokkies saam met groente soos soetrissie, uie en sampioene op sosatiestokkies. Braai dit oor mediumhoë hitte tot die vleis gaar en die groente sag is.

Volstruisvleisburgers

Vorm gemaalde volstruisvleis wat met sout, peper en jou keuse van kruie en speserye gegeur is in burgervleiskoekies. Braai die koekies oor matige hitte tot hulle na jou smaak gaar is. Sit voor in vars bolletjies met jou gunstelinggarnering!

Volstruistaco’s 

Marineer dun gesnyde volstruisvleis in ʼn mengsel van lemmetjiesap, rissiepoeier, komyn en knoffel. Braai die gemarineerde vleis tot deurgaar en effens geskroei. Sit voor in warm tortillas met jou gunstelingtacobolae soos gesnipperde blaarslaai, tamatieblokkies, avokadosnye en salsa.

Volstruissaté 

Marineer dun repe volstruisvleis in ʼn mengsel van klappermelk, kerriepoeier en sojasous. Ryg die gemarineerde vleisrepe op sosatiestokkies en braai hulle oor mediumhoë hitte tot deurgaar. Sit die volstruissaté voor met ʼn grondboontjiebotterdoopsous.