Waterslim Kruie Vir Jou Braaiery

Water is ŉ skaars kommoditeit en moet die doeltreffendste gebruik word om die meeste uit elke druppel te put. Een van die maklikste maniere om water te bespaar, is om plante reg langs jou braaier te kweek wat jy vars kan pluk om geur aan maaltye te verleen, en deur hulle in houers te hê, spaar jy baie.

Pitbenatting

Daar is tans houers verkrygbaar wat ŉ uiters doeltreffende natmaakstelsel het wat gebruik maak van ŉ pit – gewoonlik tou of materiaal – om water van ŉ reservoir na die plantwortels te vervoer waar dit nodig is. Dit gebeur deur kapillêre werking wat water stadig van die waterbron boontoe beweeg. Hierdie soorte pitwaterstelsels lei daartoe dat plante dikwels weke op ŉ keer sonder natmaak sal uithou.

Houerkweek

Houers is ŉ nuttige manier om kruie, groente en vrugte te kweek en die grondmedium te manipuleer om so min water moontlik te gebruik. Deur goeie gehaltepotgrond te gebruik waarby waterabsorberende kristalle, vermikuliet en goeie kompos gevoeg is, verseker jy dat natmaaktye verminder word, hoewel die plante steeds gelukkig is. Ook sal die groepering van plante met soortgelyke waterbehoeftes baie help om waterverbruik te verminder.

Geharde Kruie Gebruik Minder Water

Deur die regte kruiekeuse te maak, is nog ŉ manier om water te bespaar. Hierdie is net ŉ paar smaaklike kruie wat min water nodig het.

Roosmaryn – naaldagtige blare is ŉ teken dat ŉ plant droogtebestand is. Roosmaryn is een van daardie plante wat baie min water nodig het as dit eers gevestig is. In ŉ houer het dit water nodig as die grond bo-op net droog is.

Tiemie – hierdie kruid gedy op verwaarlosing wat die minimum water insluit. Ook, hoe meer jy dit sny, hoe meer groei dit.

Origanum – is nog ŉ taai kruid wat goed saam met roosmaryn en tiemie groei vir ŉ gemengde houer. Dit sal oor die kante van die pot rank vir ŉ mooi effek.

Wenk:

Roosmarynstingels maak die beste steekpenne vir vleis, vis of groente wat ŉ subtiele kruiesmaak aan die bestanddele gee terwyl hulle kook. Wees op die uitkyk na die Rosemary Barbeque-variëteit met reguit stingels wat perfek vir gebruik as stokkies is.