Skitterende agapanthus 

Hulle groei moeiteloos, en wanneer hulle in die somer in volle blom is, kan min ander meerjariges hul prag en grasie ewenaar.

Die beste van blou 

Agapanthus ‘Blue Velvet’ is ’n sterk groeier wat groot blomkoppe produseer met donker, violetblou blomme, elk met ’n donkerder middelnerf. Die blomstingels, wat tot 80 cm hoog of selfs hoër kan word, maak hulle dadelik opvallend in ’n bedding. Gee hulle ruimte om te versprei, tot 80 cm wyd.

Agapanthus ‘Buccaneer’ is ’n lieflike variëteit met donkerblou blomkoppe wat oopgaan in helderblou, trompetvormige blomme, elk met ’n prominente donkerpers aar. Dit is ’n langblommende hibried wat van lente tot laatsomer kleur lewer, en omdat dit herhalend blom, kan jy ook in ander maande van die jaar blomvlae verwag. 

Hierdie een word as ’n mediumgrootte agapanthus geklassifiseer, met blomstingels van 30 cm hoog en polle met donkergroen, lintvormige blare wat 30 cm wyd versprei. 

Hoe om alle agapanthus gelukkig te hou 

Daar is twee wanopvattings oor inheemse agapanthus. Hoewel hulle baie maklik is om te kweek en van nature taamlik taai is, hou hulle tog van ’n bietjie liefdevolle sorg in ruil vir baie blomme. Nog ’n rede waarom hulle dalk nie so goed blom soos verwag nie, is dat hulle dikwels in te diep skadu geplant word, waar hulle met die wortelstelsels van bome moet meeding. 

• Plant agapanthus in volson of ligte skadu, soos oggendson en middagskadu.
• Plant hulle in gekomposteerde grond met goeie dreinering en voeg ’n wortelbouende kunsmis by. 
• Hoewel hulle droogtebestand is sodra hulle gevestig is, sal hulle baie beter blom as hulle in die somer redelik gereeld natgemaak word. 
• Voed met ’n stadige vrystellende, gebalanseerde kunsmis van lente tot herfs om baie blomme te verseker. 
• ’n Vyand is die lelieboorder, wat die plante kan doodmaak as dit nie betyds opgemerk word nie; hou dus dop daarvoor. 
• Verlies aan blomkrag kan soms veroorsaak word deur polle wat te oorgroei en dig geword het. Verdeel en herplant elke 3 tot 5 jaar in vroeë lente. 
• Sny gereeld blomstingels vir die vaas; dit sal meer blomme aanmoedig.