Bring die Mediterreense styl na binne

Potte met sitrus en kruie in terracottahouers teen ‘n saffierblou see-agtergrond is ‘n ikoniese Mediterreense styl. Maar miskien is daar nog ‘n manier om die styl te kry met iets effens anders. 

‘n Mediterreense styl is warm en uitnodigend, met aardse kleure, dekoratiewe teëls, kleurryke patrone, en ‘n tikkie see in die ontwerp. Stel jou ‘n bakkende son voor, en jy sal verstaan waarom ons vetplant-tipe plante gekies het om hierdie styl te verteenwoordig en water te bespaar. 

Calandiva and Kalanchoe

Wat begin het as enkelblommende Kalanchoe blossfeldiana het ontwikkel tot Calandiva, met dubbel blomme wat soos miniatuurrose lyk. Die Calandiva-kultivar van Kalanchoe het dieselfde kweekgewoontes en -vereistes as die oorspronklike, net met 28 meer blomblare op elke blom. Daar is ‘n verskeidenheid blomkleure, insluitend rooi, oranje, ligpienk, helderrooi, geel, en wit, en hulle hou tot ses weke, wat hulle superkragstatus gee. Of dit binnenshuis of buite is, hierdie pragtige vetplante is taai huisplante wat lank hou. Kyk uit vir die nuutste hibriede ‘Else Flower’ in jou plaaslike kwekery en tuiswinkel. 

Pilea peperomioides

Die unieke waterlelie-agtige blare van hierdie Pilea, ook bekend as die Chinese geldplant of pannekoekplant, is sy aantreklikste eienskap. Boonop is dit maklik om te onderhou en veelsydig om as ‘n ontwerpelement te gebruik, wat pragtig met ander plante kontrasteer. Ignoreer dit ‘n bietjie, en dit sal lank hou. Buitendien kan ons almal ‘n simbool van geluk in ons huise gebruik. 

Pilea depressa

Hierdie klein Pilea is ‘n aantreklike rankplant wat maklik is om te versorg en met baie gebruike in die huis. Hierdie Pilea oorleef ook goed in areas met min lig. Die truuk met hierdie plant is om dit nie op te piep nie en dit beslis nie te veel water te gee nie. Dit werk goed op rakke waar dit oor helderkleurige potbedekkings kan hang. 

Peperomia angulata

In sommige kulture simboliseer hierdie rankplant, met sy gepunte blare en kenmerkende liggroen are, voorspoed en goeie geluk. Net soos die Pileas, doen hierdie Peperomia die beste wanneer dit meestal geïgnoreer word. Dit is ‘n uitstekende plant vir ’n hangmandjie en werk goed as ’n kontrasplant saam met ander vetplante op hierdie lys. 

BASIESE VERSORGING

Al hierdie plante het vetplantblare, wat beteken hulle kan ‘n ruk sonder water klaarkom. Hier is ‘n paar basiese versorgingsinstruksies wat vir almal geld.

• Plaas in helder, indirekte lig.  

•  Hou die grond effens klam en moenie die plante ooit in water laat staan nie. Laat die grond uitdroog voor jy weer water gee.   

• Maak seker die grondmedium dreineer goed.  

• Voed maandeliks in die lente en somer met ‘n vloeibare plantvoedsel.  

• Verwyder verlepte blomme in die geval van die Kalanchoes. 

Al hierdie plante is gekweek deur LVG Plants en is beskikbaar by jou plaaslike huisplanthandelaar.