Calandiva ‘Else’

Vir langdurige blomme in sterk kleure, probeer Calandiva ‘Else’ ook bekend as Kalanchoe ‘Else’.

Dit is ‘n variëteit van Kalanchoe blossfeldiana en bekend vir sy kompakte groei wat beide binne en buite gebruik word. Binnenshuis is hierdie groot vetplante maklik om in die regte toestande te kweek.

Beligting

Die beste posisie in die huis vir ‘Else’ is een met helder lig, maar nie direkte sonlig nie. As die plant yl word, kry dit waarskynlik nie genoeg lig nie. Dit kan na ‘n minder helder plek geskuif word nadat dit klaar geblom het.

Stokkietoets vir natgooi

Dit is ‘n vetplant, so wees suinig met natmaak. Kyk of jou plant water nodig het met ‘n houtpen as ‘n ‘peilstok’ – steek dit in die grond, wag ‘n minuut of twee en verwyder dit. As dit skoon en droog uitkom, moet jy natmaak. Neem die plant na die wasbak, gooi nat en laat die water vrylik dreineer voordat dit terug in ‘n dekpot of potpiering gesit word.

Temperatuur

Warmer klimate word verkies en ‘Else’ is nie rypgehard nie. Hou dit uit koue trekke, maar maak terselfdertyd seker dat dit goeie lugsirkulasie het om die plant vry te hou van moontlike swamsiektes.

Voeding

Gee jou calandiva elke paar weke ‘n hupstoot gedurende sy blomseisoen met ‘n vloeibare plantvoedsel. Jy kan dit verminder in die winter.

Onderhoud

• Verwyder dooie blomme gereeld.
• Wees op die uitkyk vir plae soos plantluise en witluise.
• Snoei terug om die plante bosserig en kompak te hou.

Hoe om calandivas weer te laat blom

Die blomme van hierdie mooi plante is soos miniatuur dubbele rose en beskikbaar in helder kleure insluitend rooi, magenta, pienk, geel, oranje en wit. Tydens sy natuurlike groei- en blomsiklus sal ‘n calandiva ‘n rusperiode met kort dae en lang nagte nodig hê om blomknoppe te maak. Om daglig te manipuleer, plaas dit in ‘n kas vir vier ure per dag. Gee spaarsamig water en sowat twee maande later behoort jy blomme te sien verskyn. Bemes dit en vermeerder die water na normaal.

Hierdie plante word deur LVG Plants gekweek en is by kleinhandelafsetpunte en kwekerye te kry.