Dramatiese Dekor

Wanneer dit buite somber is, kan jy op plante met mooi blaarpatrone staatmaak om jou binnenshuise omgewing op te helder. 

Calatheas 

Toe dit by calatheas kom, het Moeder Natuur ‘n verfkwas uitgehaal en met patrone op groot, pragtige blare gespeel. Die blare van hierdie wonderlike huisplante in skakerings van groen met dikwels ‘n bruinrooi onderkant, is asemrowend. Dit is genoeg rede om hierdie plante te kweek. 

Calatheas staan ook bekend as die ratelslangplant en word soms die sebraplant of gebedsplant genoem, weens hul noue verwantskap met marantas. Anders as marantas, vou hulle nie hul blare snags toe nie. Die blare beweeg egter gedurende die dag agter die lig aan. Sommige calatheas is na die Goeppertia-genus verskuif. 

Hoe om dit te kweek 

Dit is belangrik om op te let waarvan calatheas hou om die beste uit hulle te kry. Let op die volgende:

• Hulle benodig ‘n warm plek in helder, indirekte lig. Direkte sonlig kan die blare skroei. Hulle sal nie goed vaar met temperature onder 15 °C nie.  

• Gebruik slegs gefiltreerde of reënwater. Die chemikalieë in kraanwater kan veroorsaak dat die blare kolle vorm. Dit sluit besproeiing in. Hou die grond egalig klam, maar nie papnat nie. ‘n Bietjie water, meer gereeld, werk goed vir calatheas. Maak seker dat oortollige water wegdreineer, en moenie hulle in water laat staan nie.  

• Hulle verkies hoë humiditeit van tussen 50% en 70%. Ongeveer 60% is ideaal vir hierdie plante. Groepeer kamerplante saam om die humiditeit rondom hulle te behou of plaas hulle op klippe in ’n bak gevul met water. As die lug te droog is, kan die blaarpunte verbruin. Badkamers is ideaal om die humiditeitsvlakke vir die plante te verhoog.  

• Voed elke maand met ‘n vloeibare plantvoedsel.  

• Vee die blare af om stofophoping te voorkom en die blare welig te hou. 

Variëteite  

Kyk na hierdie pragtige variëteite wat nou beskikbaar is: 

• ‘Burle Marxii’ – donker- en liggroen in ‘n visgraatpatroon.  

• ‘Maria’ – ‘n donkergroen rand gevul met lig- en donkergroen kwasstreeppatrone. 

• ‘Setosa Green Flag’ – kakiegroen met donkergroen vlekke.  

• ‘Beauty Star’ – fyn liggroen kwasstrepe op ‘n donkergroen agtergrond.

Probleemoplossing  

Terwyl baie huisplante byna geïgnoreer kan word, benodig calatheas konstante inspeksie om seker te maak hulle het wat hulle nodig het. Dit mag tyd vat, maar sal die moeite werd wees. Kyk na hierdie algemene probleme en hanteer hulle dadelik. 

• Blare wat na binne krul, is ’n teken van te min water.  

• Vergeling of verwelking van blare is ‘n teken van te veel water.  

• Bruin kolle kan deur te veel direkte sonlig veroorsaak word.  

• Verbleikte blare is ‘n teken van te veel lig.  

• Bruin kolle op die blare is ‘n swam wat deur waterdruppels veroorsaak word.  

• Soos voorheen genoem, dui bruin rande of punte aan dat die lug te droog is.  

• Wees op die uitkyk na spindrade, wat rooi spinmyte kan wees. Hierdie baie klein myte lê eiers aan die onderkant van blare en besmet die plant weens swak lugsirkulasie.

Skoonma-se-tong 

Dracaena trifasciata ‘Laurentii’ (voorheen Sansevieria) is nog ‘n huisplant met mooi blare wat baie min versorging benodig. Hierdie geharde vetplant is baie droogtebestand en kan sout omgewings verdra. Dit kan vir ‘n lang tyd verwaarloos word voordat dit sy ontevredenheid wys. Kweek in alle soorte lig, gee dit ongeveer een keer per maand water (te veel water is ‘n probleem), en voed dit twee keer per jaar. 

Al hierdie plante word deur LVG Plants gekweek en is landwyd beskikbaar waar huisplante verkoop word.