Freddie se gunstelinge – Plaaslik en skitterend

Sluit by Freddie aan om uit te vind watter plante nuut en gewild is. Hierdie Blommende Gunstelinge is dié maand by tuinsentrums landwyd beskikbaar om in jou tuin of in ‘n pot geplant te word. 

Gazanias 

Die hoogtepunt van madeliefies in skakerings van oranje, geel, rooskleurig, rooi, pienk, brons en goud en gestreepte variasies moet die sonliefhebbende gazanias wees. Hierdie inheemse plante kan die sout toestande aan die kus weerstaan, wat hulle uitstekende beddingplante maak vir warm areas van die tuin, in blombeddings, houers of hangmandtjies.  

Om gazanias te kweek 

• Plant in volson om die beste blomme te kry.   

• Dit groei in byna enige grond, solank dit goed dreineer. Voeg kompos by wanneer jy plant om die grond te verbeter.  

• Alhoewel hulle droogtebestand is, sal hulle beter doen met gereelde water of op reën staatmaak.  

• Verleng die blomtyd deur dooie blomme te verwyder. 

Gewilde variëteite 

‘New Day’ – groot, helderkleurige blomme. Baie lae onderhoud en ‘n kompakte groeier. 

 ‘Kiss’ – eenvormige plante met veelvuldige blomme. wees op die uitkyk vir die pragtige gestreepte variëteite.  

‘Gazoo’ – laaggroeiende spreidende variëteit met donkergroen blare en groot, helder blomme.  

‘Zany’ – bekend vir sy uitstekende prestasie en lieflike oranje-en-geel geskakeerde blomme. 

Blomme sal op bewolkte dae en snags na sonsondergang toemaak. 

Pelargoniums 

Met hul helder blomme en droogtebestande natuur, is immergroen meerjarige pelargoniums die perfekte keuse vir houers of tuinbeddings. Vir plesier die hele somer lank, plant dieselfde blomkleur in ‘n vensterbak in ’n kontrasterende kleur om daardie tipiese Mediterreense prentjie te kry. 

Hoe om hulle te versorg 

• Plant in volson, maar lees die etiket, want sommige sal beter vaar met ‘n bietjie skaduwee.  

• Plant in goed dreinerende, vrugbare grond met kompos, beenmeel en ‘n hand vol stadig vrystellende kunsmis verryk.  

• Gee matig water in die lente en somer en verminder water in die koeler seisoene. 

• Voed in die groeiseisoen elke twee weke met ‘n vloeibare plantvoedsel.   

• Sodra hulle ‘n bietjie yl word, neem steggies of gooi hulle op die komposhoop en herplant die volgende jaar.  

• Knyp die groeipunte terug om hulle bosagtig te maak.  

• Verwyder gereeld dooie blomme om nuwe groei en blomme te bevorder. 

Wees op die uitkyk na 

‘Turkana’ – ‘n eenvormige plant met donker blare wat met verskeie kleurryke blomme kontrasteer.  

‘Kariba’ – sterk plante met ‘n spektrum van helder kleure.  

‘Tacari’ – ‘n variëteit met ‘n kompakte vorm en hope netjiese blomme in baie kleure.  

‘Champion’ – ‘n wenner in die genus met lieflike dubbele blomme en gehard.  

‘Marcada’ – semi-rankend wat bestand is teen hoë hitte en ‘n sterk, geil plant. 

WENK: Kies die aromatiese variëteite en kneus die blare vir ‘n vars kamergeur. 

Dianthus 

Dianthus, ook bekend as angelier of “sweet Williams”, is bekend vir hul speserygeur en hulle blom lank, wat hulle perfek maak vir tuinbeddings of houers. Daar is honderde spesies, maar hul blomme is hoofsaaklik pienk, salm, rooi of wit. Die verskillende spesies bereik verskillende hoogtes en volumes en kan verskillende kweekvereistes hê, maar hulle het almal die volgende nodig: 

Om te kweek 

• Plante moet daagliks minstens ses uur se sonlig kry, met middagskaduwee, wat voordelig is.  

• Hulle verkies klam grond en moet gereeld natgemaak word, veral in warm weer. Oormatige water kan egter ook ‘n probleem wees, en dit is die beste om op grondvlak water te gee om swamsiektes te voorkom.  

• Plant in goed dreinerende grond. Hulle kan by baie grondtipes aanpas, maar verkies ryk, vrugbare grond om te floreer.  

• Voed jaarliks met ‘n stadig vrystellende kunsmis.  

• Verwyder dooie blomme deur net onder die blomkoppe tot by die eerste stel blare te knip 

Kies jou gunsteling 

‘Diamond’ – ‘n variëteit wat uitstekende in die tuin vaar in ‘n mengsel van rooi, pienk, wit, pers en picotee-kleur.  

‘Amazon’ – ‘n langer variëteit (tot 45 cm) met blomme wat lank hou in ‘n vaas.  

‘Super Parfait’ – sterk plante met groot tweekleurige blomme op stingels van tot 25 cm.  

‘Diana’ – groot enkelblomme in ‘n ongewone kleurreeks. Laag groeiend tot 25 cm.  

‘Ideal Select’ – rypbestand met baie blomme met mooi kantrandjes. 

Lobelia 

Eenjarige en meerjarige lobelia is bekend vir hul treffende blou skakerings, sommige regop en sommige rank oor houers en hangmandjies met tallose klein blommetjies. Daar is egter meer as net die blou skakerings blomme; nou kan jy wit, pienk, pers en selfs rooi vind op sterk plante wat massas blomme produseer. 

Het jy geweet?  

Lobelia erinus is een van die byna 70 spesies wat inheems aan Suid-Afrika is. 

Hoe om dit te kweek 

• Kies ‘n posisie in volson of skaduwee.  

• Hulle verkies almal vrugbare grond wat goed dreineer, so berei die grond goed voor met baie kompos voor plant. Voeg stadig vrystellende kunsmis by om hulle aan die gang te hou en ‘n goeie hupstoot te gee.  

• Gee gereeld water en moenie die grond toelaat om uit te droog nie. ‘n Gebrek aan water sal veroorsaak dat die plant doodgaan en blom beïnvloed. In warm weer moet jy houers liefs daagliks natmaak.  

• Voed elke twee weke met ‘n vloeibare plantvoedsel om die plant sterk te hou en blomme te produseer.  

• Jy hoef nie die dooie blomme van hierdie plante te verwyder nie, maar hulle kan soms ‘n snoei nodig hê om hulle netjies te hou. 

Kies uit hierdie 

‘Curacao’ – helderblou blomme op ‘n bolvormige plant. Dit groei tot 25 cm en is uiters bestand teen hitte.  

‘Heatopia’ is ‘n kompakte bolvormige plant met treffende vryblommende blomme wat ewe goed in koue en hitte aard.  

‘Riviera’ – ‘n dwergvariëteit met ‘n kompakte groeiwyse wat slegs 13 cm bereik. Beskikbaar in ‘n verskeidenheid kleure.  

‘Crystal Palace’ – donkerblou tot pers blomme in ‘n kompakte plant (13 cm). Lae onderhoud en rypbestand.

Moenie vergeet nie 

Saailinge van grasuie, knoffelgrasuie en kruisement sal nou op hul beste in die tuinsentrums wees. Het jy geweet dat kruisement en grasuie beste maats in die tuin is? Hulle werk goed saam deur insekte af te weer, groei te verbeter, en die aantal voordelige insekte in die tuin te vermeerder. In ideale toestande groei kruisement vinnig en neem maklik oor, so plant dit liefs in houers en potte wat in die grond geplant is. Wees op die uitkyk na interessante variëteite van kruisement, insluitend sjokolade-, pynappel- en appelkruisement. 

Aan jou gebring deur die Beddingplantkwekersvereniging (BPGA)