‘n Winterwonderland met eenjarige plante

Sluit by Freddie aan om uit te vind watter plante nuut en gewild is. Hierdie Blommende Gunstelinge is dié maand by tuinsentrums landwyd beskikbaar om in jou tuin of in ‘n pot geplant te word.

Petunias

Petunias is bekend vir hul lang blomseisoen en die groot verskeidenheid kleure en patrone wat jy in ‘n saailingbak kan kry. Hulle blom van lente regdeur tot herfs. Daar is verskeie tipes, insluitend spreidende en rankende soorte, en hulle kan in tuinbeddings geplant word, as grondbedekking gebruik word, en maak uitstekende potplante op hul eie of gemeng met ander plante.

Wees op die uitkyk na ‘Wave’, ‘Merlin’, ‘Daddy’, ‘Shake’, en ‘Dreams’ by jou plaaslike kwekery en gaan mal.

Hoe om te kweek

Plant in volson, anders sal hulle lank en yl word.

Verbeter grond met kompos en maak seker dit dreineer goed. Gebruik goeie potgrond in houers en voeg perliet by vir ekstra dreinering.

Gee minstens een keer per week deeglik water en houers meer gereeld. Diep watertoediening moedig diep wortels aan.

Voed maandeliks met ‘n gebalanseerde plantvoedsel.

Snoei lang en yl petunias in die laatsomer om meer blomme aan te moedig.

Verwyder dooie blomme op variëteite wat dit nodig het.

Hou dop vir plantluise en slakke.

Kortliks

Petunias is hittebestande, kleurryke en langdurige eenjarige plante.

Lobularia

Lobularia maritima, beter bekend as Sweet Alyssum, het trosse blomme wat ‘n soet geur afgee wat kleiner bestuiwers lok. Hulle blom in koeler weer in die lente, neem ‘n ruskans in die hitte van die somer, en kom dan in die herfs terug. Dis meestal wit, maar is ook in sagte lila, pienk en pers kleure te kry. Wees op die uitkyk na ‘Flash’ en ‘Easy Breezy’.

Hoe om te kweek

Kweek in volson en gedeeltelike skaduwee in baie warm klimate.

Plant baie saam in die tuin, want hulle gee nie om om opmekaar te wees nie, en die vertoning wat hulle maak, sal die moeite werd wees. Plant in potte saam met ander eenjariges as kontrasterende kleure.

Maak die saailinge eers nat om oorplantingstres te vermy. Hulle verkies egalig vogtige grond met ekstra water in droë tye en, soos gewoonlik, meer water vir goed dreinerende houers.

Voeg kompos by die grond wanneer jy plant.

Wanneer hulle ‘n bietjie moeg lyk, sny ‘n derde af en hulle sal weer blom.

Vermy te nat grond, wat tot wortelverrotting kan lei, en hou dit dop vir witroes.

Kortliks

Alyssum het ’n soet geur en groei laag, met pragtige blomme wat bestuiwers aantrek.

Primulas

In die winter sal Primula malacoides of fairy primula enigiemand se dag ophelder. Die trosse groen blare spruit stingels met trosse fyn blomme in wit, pienk, pers en rooi. Hulle is werklik vir die feetjies gemaak. Wat wonderlik is hiervan, is dat hulle goed blom in gedeeltelike skaduwee sowel as in volson.

Hoe om te kweek

Plant in goed dreinerende grond met bygevoegde kompos en enige organiese materiaal om die grond bros te maak en om vog te behou.

Hulle verkies vogtige grond, maar nie waterversadigde grond nie, en houers moet daagliks water kry. Hulle is dorstige plante.

Voed met ‘n gebalanseerde kunsmis wanneer jy plant, en dan eers weer na ses weke. Hulle hou nie daarvan om oorvoed te word nie.

Bring ’n deklaag rondom die basis aan om water te bewaar.

Kortliks

Hierdie primulas blom die hele lente en herfs weer met delikate blomme wat bye en skoenlappers lok.

Brachyscome

Ook bekend as swan river daisy. Hierdie kompakte, bolvormige madeliefies sal van lente tot laatsomer blom met baie kleurryke blomme in wit, pienk en pers (‘Fresco’). Hierdie madeliefies is ook uitstekende houerplante.

Hoe om te kweek

Plant in volson vir meer blomme, maar hulle sal ook in gedeeltelike skaduwee groei.

Hulle verkies goed dreinerende grond wat effens suur is met baie kompos bygevoeg wanneer dit geplant word.

Sodra gevestig, is hulle droogtebestand, maar benodig ekstra water in goed voorbereide houers wat goed dreineer. Laat hulle eerder uitdroog as om te oorwater.