Rose met Hoofkarakter-energie!

Plantland hou ‘n wye reeks hoogs ornamentele plante aan, asook tuisgekweekte rose. Nie alle rooskultivars wat wêreldwyd bedink en ontwikkel is, vul hul kweekhuise nie, maar hulle het beslis ‘n paar wenners in produksie en wat nou reg is om te plant:  

‘Princess Charlene De Monaco’

Kan jy glo dat ‘n Suid-Afrikaanse meisie ‘n prinses van die Koninkryk van Monaco is en dat ‘n pragtige roos na haar genoem is om haar te vereer? Hierdie een het die bekoring van outydse tuinrose, maar met die eienskappe van moderne rose. ‘n Regop groeiwyse met glansende, donkergroen, siekteweerstandige blare ondersteun groot peonievormige blomme met gekartelde appelkooskleur tot skulppienk blomblare met ‘n tikkie oker. Dit blom herhaaldelik en het ‘n uitsonderlike geur. Uitstekend as snyblom. 

‘Pope John Paul’

Hierdie roos is opgedra ter nagedagtenis van Pous Johannes Paulus II en is in 2013 deur die Vatikaan gekies om in sy tuine geplant te word. Die onderskeidende teeroos produseer groot en elegante, vol, dubbele blomme in romerige wit, en het natuurlik ‘n ‘hemelse’ sitrusgeur. Wit rose is gewilde snyblomme; plant hierdie een ook. 

‘Hannon’ 

Plaaslik is die gewilde TV-aanbieder, stilis en skoonheidskonsultant Hannon Bothma ‘n bekende naam en ‘n diva. Nog ‘n potensiële diva, ‘n helderkleurige rooskultivar wat oorspronklik in Frankryk onder ‘n saaklike kodenaam geteel is, is deur ons gekies om die Glam Guru te vereer, soos hy graag sê: “Elke dag van jou lewe kan mooi en spesiaal wees.” As jy na hierdie roos kyk, kan jy die belofte glo… Dit is ‘n regop tot spreidende teeroos met vol, dubbele en groot, magenta tot rooierige pienk blomme met ‘n subtiele geur. Plant hierdie een as jy op soek is na meer snyrose. 

‘Little Red Hedge’  

Rose word nie net genoem na familielede, koninklikes of beroemde mense nie. Hul naam kom soms van hul goeie eienskappe, en die woorde ‘Little Red Hedge’ sê presies dit. Afgesien van sy vele, effens hangende en spreidende sytakke op heuphoogte, produseer dit ‘n deurlopende fees van gepunte helderrooi knoppe wat in massas klein blommetjies oopmaak. Dit is nie net vir heinings nie, maar ‘n fantastiese roos om in ‘n pot te plant. As jy graag romantiese mini-blomrangskikkings maak, is hierdie een perfek vir jou.