Wees ‘n Waterstryder

Jy hoef nie baie liters water te gebruik om jou tuin mooi te maak nie. Hier is ʼn paar slim tegnieke vir verantwoordelike waterverbruik.

In Die Hidrosone

Hidrosones is ʼn spelwisselaar as dit by doeltreffende tuinmaak kom. Deur plante volgens hul watervereistes te groepeer, kan ons natmaakpraktyke aanpas om aan hul bepaalde behoeftes te voldoen. Of dit nou in tuinbeddings of houers is, kan ons deur plante met soortgelyke waterbehoeftes saam te groepeer, genoeg hidrasie verskaf sonder om hulpbronne te vermors. Plante met hoë waterverbruik kan byvoorbeeld in een watersone gesit word, terwyl dié met lae watervereistes nog ʼn groep kan vorm.

Hierdie groepering bied talle voordele:

• Dit maak waterverbruik so doeltreffend moontlik.
• Dit bevorder gesonde groei.
• Dit verlaag waterstres by plante.

Verbeter Jou Grond

Plantgesondheid begin by grondgesondheid, en goeie grond help ook water bespaar. Berei jou grond vóór plant goed voor deur organiese materiaal in die vorm van kompos of verrotte mis, asook beenmeel of superfosfaat vir sterk wortels, en ʼn stadig vrystellende organiese misstof in te werk. Vermikuliet is ook ʼn goeie keuse as jy die waterhouvermoë van die grond wil verhoog.

Deur dit te doen, sal jy:

• sterk wortels vir doeltreffender wateropname ontwikkel;
• waterafloop verminder;
• waterhouvermoë verhoog; en
• gesonder plante kweek.

Maak Op Die Regte Tyd Nat

Ons weet almal dat ons ons tuine moet natmaak, maar baie van ons kies die verkeerde tye daarvoor. Deur te besef wanneer die beste natmaaktye is, kan ons plante se welstand verseker terwyl ons watervermorsing verminder.

Daar word algemeen aanbeveel dat tuine soggens vroeg natgemaak word om plante in staat te stel om vog op te neem voor die hitte van die dag begin. Dis egter noodsaaklik om grondvog gereeld te monitor en hoe gereeld natgemaak word, aan te pas volgens spesifieke plantbehoeftes. Dalk moet daar gedurende warm somermaande saans ekstra natgemaak word om jou plante te help om oornag te herstel.

Natmaak op die regte tyd hou verskeie voordele in:

• Dit beperk waterverdamping tot die minimum.
• Dit help keer swamsiektes.
• Dit help plante om water doeltreffend op te neem.

Veel Meer Deklae

Bedekking is ʼn doeltreffende tegniek wat nie net die estetiese bekoring van ons tuine verbeter nie, maar ook ʼn noodsaaklike rol by waterbewaring speel. Deur ʼn laag anorganiese of organiese materiaal soos basspaanders, strooi, kompos, klippe, gruis, neutedoppe of blare op die grond toe te dien (en geen kaal grond sigbaar te laat nie), skep ons ʼn beskermende bedekking met baie voordele:

• Dit reguleer grondtemperatuur.
• Dit verbeter grondvrugbaarheid.
• Dit onderdruk onkruidgroei.
• Dit bewaar vog.
• Dit verminder waterafloop.

Gebruik Polimeerkristalle

Innoverende polimeerkristalle wat ook as waterabsorberende kristalle of hidrojel bekend staan, het dit veel makliker gemaak om tuin te maak sonder om water te mors. Hierdie klein korreltjies het ʼn buitengewone vermoë om groot hoeveelhede water op te neem, te behou en dan aan plantwortels vry te stel, wat verskeie voordele bied:

• ʼn Laer natmaakfrekwensie.
• Gesonder, veerkragtiger plantgroei.
• Florerende plante selfs in uitdagende toestande.
• Meer waterslim houertuine en hangmandjies.
• Verbeterde waterhouvermoë van skraal grondsoorte.

Vir meer inligting besoek www.lifeisagarden.co.za