Klimaatsveerkragtige tuine

Groener Innoverings vir die Toekoms

Rand Water ondersteun huiseienaars en gemeenskappe deurlopend om verantwoordelike waterverbruikers te raak. Dit word deels bewys deur sy Waterslim-handelsmerk. Benewens voorligting oor verskeie waterbewaringsfasette ondersoek die handelsmerk baanbrekersmetodes en -tegnieke om verantwoordelike waterverbruik te bevorder.

Tuinmaak wat dikwels bloot net as ŉ estetiese verbetering beskou word, pak werklik die uitdagings aan wat deur klimaatsverandering gestel word.

Stappe vir veerkragtige tuinontwerp om klimaatsveranderingsbeperkings te verminder:

1. Hidrosonering: Groepeer jou plante met soortgelyke watervereistes om onnodige waterverbruik te verminder. Dit kan bereik word deur die volgende sones by jou tuinontwerp in te sluit:

Hoë watergebruiksone: Bedek 10-30% van die tuin. Hierdie gebied het meer water nodig (750-1000 mm per jaar).
Medium watergebruiksone: Bedek 20-40% van die tuin. Plante in hierdie sone ontvang beperkte water (500-750 mm per jaar).
Lae watergebruiksone: Bedek 30-60% van die tuin. Hierdie gebied moet 300-500 mm water per jaar ontvang.
Uiters lae watergebruiksone: Hierdie sone moet die grootste deel van die tuin beslaan (< 300 mm water per jaar).

2. Inheemse Plantkeuse: Namate klimaatsverandering ontwikkel, verander dit ekostelsels wat dit deurslaggewend maak om plante te kies soos Aloe africana en Portulacaria afra (spekboom) wat in die lae watergebruikhidrosone gekweek kan word en by die nuwe omgewing kan aanpas en gedy. Vanweë hul vermoë om by die plaaslike omgewing aan te pas, benodig inheemse plante minder water (wat ook verbeter kan word deur die gebruik van ŉ deklaag), onderhoud en plaagdoders.

3. Volhoubare Materiale: Die gebruik van volhoubare materiale is ewe belangrik vir tuinmaak as die gebruik van plante. Kies vir jou tuinmaaktake herwonne of volhoubare materiale wat plaaslik verkry word.

4. Intelligente Besproeiingstelsels: Die meeste verslae meld dat hul slim besproeiing ongeveer 50% aan waterverbruik bespaar. Dis noodsaaklik om te investeer in intelligente besproeiingstelsels wat die weer kan monitor en natmaakskedules kan verander.

5. Koolstofsekwestrering van Tuine: Suid-Afrika is nie net die vasteland se hoogste kweekhuisgasvrysteller nie, maar tel ook onder die top-25 vrystellers wêreldwyd. Afgesien daarvan om die estetiek van jou tuin te verbeter, ondersteun die plant van bome en struike die opname van koolstofdioksied. Bome is ŉ natuurlike hulpbron in ons stryd teen kweekhuisgasvrystellings omdat hulle suurstof in die atmosfeer vrystel en koolstofdioksied opneem. Gemaakte vleilande dien ook as ŉ enorme koolstofsekwestreerder.

6. Reënwateroesting: Oes reënwater deur dit in ŉ watertenk op te vang. Onthou dat 1 mm reënwater gelykstaande is aan 1 liter water vir elke oppervlak van 1 m2. Jy kan tot 30% water bespaar deur alternatiewe waterbronne te gebruik.

Wanneer jy volhoubaarheid en klimaatsveerkragtigheid by jou tuinontwerp insluit, skep jy nie net ŉ mooi buiteplek vir jou en jou familie om te geniet nie, maar dra jy ook tot wêreldgesondheid by. Namate ons ons beywer om die gevolge van klimaatsverandering te verminder, laat jou tuinmaakkeuses dien as ŉ stelling van jou toewyding tot ŉ volhoubaarder en ekologies vriendeliker toekoms.

#WeesWaterslim