Topwaterbesparingswenke om jou waterrekening te verminder

Deur eenvoudige wenke te gebruik om jou waterverbruik te verminder, sal jy uiteindelik jou waterrekening verlaag. 

As jy in ‘n gebied woon wat op die munisipaliteit staatmaak om jou watergebruik te fasiliteer, sal jy in die meeste munisipaliteite tweeledig vir water gefaktureer word. Jy word gefaktureer vir die water wat jy gebruik en die water wat in die rioolstelsel afgevoer word. Die meeste munisipaliteite neem aan dat 75% van die water wat gebruik word in die rioolstelsel ingaan. Water word ook op ‘n glyskaal in kiloliter gefaktureer (1 kl = 1 000 liter).

Die beste plan is om onder die drempel te bly om op kostes te bespaar. In Durban sal jy byvoorbeeld R39,39* per kiloliter betaal, tot op 200 liter per dag. Daarna geld die volgende bedrae: 

201-833 liter        per dag R46.70            per kiloliter 

834-100 liter        per dag R62.17            per kiloliter 

1001-1500 liter    per dag R95.91            per kiloliter 

1500+ liter           per dag R105.39          per kiloliter 

Om meer as 1 500 liter per dag te gebruik, kan baie duur raak. Daar is sekere dinge wat jy in die huis kan doen om waterverbruik te verminder. Hier is ‘n paar wenke: 

• Neem korter storte. Spotify het ‘n speellys met stortliedjies van vier minute om te help. Monitor kinders in die stort deur ‘n wekker te stel of dit ‘n speletjie te maak. Korter storte bespaar ook op die elektrisiteit wat nodig is om die water te verhit. 

• Draai die kraan toe terwyl jy jou tande borsel. Dit kan in die gemiddelde huishouding 9 000 liter per jaar bespaar. 

• Gebruik waterbesparende toestelle, soos om ‘n waterverplaser in die toilet se waterbak te plaas; installeer ‘n eko-stortkop; of ’n kombuiskraan-belugter. 

• Gebruik waterbesparende verbindings op tuinslange, voeg waterhoudende jel by wanneer jy plant, en bring ‘n organiese deklaag aan om die behoefte aan ekstra water te verminder. Installeer drupbesproeiing en weer-tydhouers om die behoefte aan ekstra besproeiing te verminder. Plant meer droogtebestande plante en gebruik ‘n grondvogsensor om potplante doeltreffend water te gee. 

• Versamel reënwater deur ‘n vat of ‘n watertenk wat aan afvoerpype geheg is, te gebruik. 

• In die kombuis, moenie die ketel te vol maak nie, wat ook elektrisiteit bespaar aangesien dit vinniger kook. Sit die skottelgoedwasser eers aan wanneer dit vol is en gebruik die eko-opsie waarmee die meeste nuwe skottelgoedwassers kom. Dieselfde geld vir die wasmasjien, en gebruik die vinnige en koue-wateropsies. Gebruik die water waarin jy groente gewas het vir die toiletbak of vir potplante. 

• Hou krane en stortkoppe goed in stand. ‘n Lekkende kraan kan liters water mors, terwyl jy dalk eenvoudig net ’n wasser kan vervang.