3 Toekossies by Braaivleis

Gelaaide skyfies

Dié gebruik van bevrore aartappels is doodmaklik en smaak lekker, wat dit ideaal maak vir jou volgende kampeeruitstappie of vleisbraai tuis. Wees ook skeppend met bolae en beproef ʼn paar van jou gunstelingkombinasies.

• 500 g bevrore aartappelskyfies
• 100 g spek, in blokkies gesny
• 100 g cheddarkaas, gerasper
• ʼn Handvol pietersielie, gekap
• 1 houer suurroom of roomkaas
• 1 avokado
• 1 rissie, gekap
• Sap van ½ suurlemoen
• Sout en peper
• Olyfolie
• Aluminiumfoelie

Maak eerste die bolae. Braai die spek in ʼn bietjie olyfolie tot bros en hou eenkant. Sit die avokado, rissie en suurlemoen in ʼn voedselverwerker, geur met sout en peper en meng tot glad. Maak ʼn bakkie van ʼn stuk foelie, sit die bevrore skyfies in en geur met sout en peper. Sit die kaas, spek en pietersielie bo-op en plaas op die rooster van ʼn braaier by matige hitte. Sodra die kaas gesmelt en die skyfies warm is, plaas dit in ʼn opdienbak en sit die suurroom en avokadoroom bo-op. Genoeg vir 4 mense.

Dilleaartappelslaai

Wat hierdie aartappelslaai ekstra lekker maak, is dat die warm aartappels met aftreksel deurtrek word vir ekstra geurdiepte.

• 4 middelslag aartappels
• ½ koppie beesvleisaftreksel
• ½ teelepel suiker
• 2 eetlepels wit wynasyn

Slaaisous

• 4 snye spek, gekap
• 1 eetlepel vars pietersielie, gekap
• 1 eetlepel vars dille, gekap
• 3 eetlepels suurroom
• 1 eetlepel Dijon-mosterd
• Sout en peper

Kook die aartappels in die skil tot gaar. Verhit die aftreksel, suiker en asyn. Sodra die aartappels genoegsaam afgekoel het om te hanteer, verwyder die skil, sny in blokkies en voeg by die warm aftreksel. Laat 30 minute deurtrek. Kook die spek vir die slaaisous in ʼn pan en meng met die ander bestanddele. Geur, gooi oor die deurtrekte aartappels en meng liggies. Genoeg vir 4 tot 6 mense.

Patatgereg

ʼn Wonderlike kombinasie wat ʼn bietjie anders is.

• 3 groot patats
• ʼn Handvol klein spinasieblare
• 200 g roomkaas
• 70 g okkerneute, grof gekap
• 100 g cheddarkaas, gerasper

Kook die patat sag, skil en sny in skywe. Sit ʼn laag onderin ʼn oondvaste bak met ʼn laag spinasieblare bo-op. Meng die roomkaas en okkerneute, skep oor die spinasie en bedek met die gerasperde kaas. Bak ʼn halfuur by 180° C sodat die geure meng en die kaas smelt en goudbruin word, en dien op.