Gerookte Forel met Lemoenslaai

Read in English

Die gebruik om kos te berook is al eeue oud, en was oorspronklik ingespan om dit vir lang tye te preserveer. Vandag berook ons hoofsaaklik vir die geur, wat ʼn ekstra dimensie aan die braai verleen.

ʼn Bietjie navorsing oor die beroking van voedsel kan dit dalk vir ʼn mens intimiderend laat lyk, met groot berokingsmasjiene en mense wat vertel van kos wat 18 uur lank berook word en heeltyd dopgehou moet word ingeval die vuur doodgaan.

Hoewel dit uitstekend vir berokingskenners is, pas dit nie ons almal nie. Met behulp van ons fynproewerrekenmeester, Karen, het ons drie forelle en drie stukke borsstuk binne net 20 minute berook, en dit was sowaar heerlik!

Die Verskil Tussen Warm En Koue Beroking

Warm beroking: dit is die metode wat ons gebruik het in die resepte wat volg. Warm beroking is bloot ʼn gaarmaakmetode wat hitte en rook gebruik om die kos gaar te maak en terselfdertyd te geur. Die kos word dadelik geëet of kan ʼn paar dae in die yskas gehou word.

Koue beroking: hierdie metode duur baie langer – dikwels verskeie dae. Die rook word in die kos opgeneem teen ʼn baie lae temperatuur van ongeveer 20°C sodat die kos kuur en glad nie gaar word nie. Hierdie metode word verkies vir die preservering van kos vir langer tye.

As jy ons manier van beroking op die proef wil stel, het jy nodig:

• ʼn berokingskis – dit is aanlyn te koop. Dit is ʼn vlekvrystaalkis wat te kry is met ʼn rooster of bak binne-in vir die kos, en ʼn deksel wat die rook binnehou. (Kyk na die produktelys op bladsy 4);
• saagsels of houtspaanders – dit is verkrygbaar by braai en hardewarewinkels. Verskillende houtsoorte en geure is te kry vir die soort kos wat jy gaarmaak, soos vleis en vis;
• ʼn hittebron – ons het ʼn gasbraaier gebruik, maar jy kan die beroker op ʼn vuur of selfs op die stoof in die kombuis sit; en
• iets om te berook, en ongeveer 20 tot 30 minute daarvoor. ʼn Mens kan allerlei kossoorte berook, waaronder vleis, hoender, vis, seekos, groente, neute en kaas.

Gerookte forel bestanddele

Dit is ʼn uitstekende manier vir die forelvissers daar buite om die vangs op te dien, en oorskietforel maak ʼn lekker forelpatee as dit met roomkaas, kappertjiesaad, baie swartpeper en suurlemoensap gemeng word. Diegene wat nie kunsvlieghengelaars is nie, kan by sommige viswinkels vars of bevrore forel te koop kry.

• 3 ontgrate heel forelle
• 1 suurlemoen, in dun skywe gesny
• Kappertjiesaad
• 1 klein rooi rissie, in skywe gesny
• 1 rooi ui, in dun skywe gesny
• Knoffelsout
• Sumak

Peperwortelroom bestanddele

• 250 g-houer crème fraiche of suurroom
• 1 eetlepel mayonnaise
• 1 – 2 eetlepels vars peperwortel, fyn gerasper
• Sout en peper

Wenk: As jy nie vars peperwortel in die hande kry nie, koop ʼn bottel geroomde peperwortel, voeg dit by die crème fraiche en laat die mayonnaise weg.

Slaai van lemoen en gemengde blare

• Gemengde bronkors en klein spinasieblaartjies
• 2 lemoene, geskil en in huisies sonder die vliese. Hou die sap.
• ʼn Skeut olyfolie
• 1 teelepel matige mosterd
• Sout en peper

Metode

Bedek die forel met pekel (1 teelepel sout op 1 koppie water) vir 30 minute. Dié stap gee meer geur en vog aan die forel.

Terwyl dit week, meng saam die crème fraiche, mayonnaise en gerasperde peperwortel. Geur met sout en peper.

Haal die forel uit die pekel uit en druk droog, sit dan die gesnyde suurlemoen en rooi ui, ʼn paar kappertjiesade en rissie in die holte. Geur met knoffelsout en sumak.

Sit ʼn laag saagsels onderin die roker en die forel op die rooster. Sit die roker op die hitte en maak die deksel dig toe sodra dit begin rook. Draai die hitte af.

Verdeel vir die slaai die lemoen in huisies oor ʼn bak om die sap op te vang. Voeg ʼn skeut olyfolie en die mosterd by en geur met sout en peper. Meng goed en gooi net voor opdiening oor die blare en lemoenhuisies.

Haal die forel na 20 minute uit die beroker uit en dien op met die peperwortelroom, ekstra kappertjiesaad en lemoenhuisies op die slaai.