Pikante Geroosterde Visplatbrode

Pikante vis is doodmaklik om te maak en so lekker. Net ŉ paar minute op die rooster en alles anders kan ruim vooruit gemaak word.

Vir Die Platbrode

2 koppies bruismeel
1 koppie gewone jogurt
Water as ŉ sagte deeg gemaak moet word
Sout
2 eetlepels olyfolie
Na keuse – ŉ bietjie van die visspeserymengsel

Sif die meel in ŉ bak, voeg die jogurt en sout by, meng tot ŉ sagte deeg en voeg nog water by indien nodig. Knie 2 minute en sit dan eenkant vir 30 minute. Verdeel dit in ses balle en rol op ŉ meelbesprinkelde oppervlak uit. Sit op ŉ matige warm rooster en braai ŉ paar minute aan elke kant. Bestryk elkeen met olyfolie of met ŉ bietjie van die visspeserymengsel vir ekstra geur.

Wenk: Maak dit vooraf. Sit elkeen in ŉ pan vir ŉ paar minute aan elke kant om net gaar te word en sit dan op die rooster wanneer jy die vis gaarmaak.

Vir Die Pikante Geroosterde Vis

Vars visfilette (met of sonder die vel)
1 teelepel gemaalde komyn
1 teelepel rissiepoeier
1 teelepel gemaalde koljander
1 teelepel sout
½ teelepel witpeper
4 eetlepels olyfolie

Meng die speserye met die olyfolie, sout en peper. Kerf effens in die vel of vleis van die vis in en vryf die hele vis met die speserymengsel. Laat staan dit minstens 30 minute voor dit op ŉ geoliede rooster op ŉ matige warm braaier gesit word. Maak ŉ paar minute aan elke kant gaar en maak seker dis net deurgaar, nie oorgaar nie. Haal van die hitte af en sit voor met die platbrode en bygeregte.