Ontbyt Aartappelkoekie Burgers

Na my mening sluit die heel beste ontbyt aartappelkoekies in, nie sommer enige aartappelkoekies nie, maar die verwerktes wat in kitskosrestaurante te kry is. Die kombinasie van bros aartappel buite en sagte aartappel binne is een van die vreugdes van eet (weer volgens my). In hierdie ontbytextravaganza kry jy TWEE aartappelkoekies in plaas van ŉ rolletjie en die gewone ontbytkos van spek en eiers.

Dien dit op met HP-sous. (Ek was op pad om my eie HP-sous te maak toe ŉ kind my daaraan herinner dat dit reeds so lekker is dat daar geen rede is om my eie te maak nie.)

Vir Die Burgers

2 aartappelkoekies per persoon
Vleiskoekie
1 gebakte eier per persoon
Streepspek, bros gebraai
Mikroblaargroente (opsioneel)
HP-sous

Stapel die aartappelkoekieburger op met ŉ aartappelkoekie, vleiskoekie, gebakte eier, spek en nog ŉ aartappelkoekie om mee af te rond. Sit voor met HP-sous.

Aartappelkoekies

Minstens ŉ paar uur in die vrieskas vir bevriesing is hiervoor nodig.

4 aartappels, halfgaar en in klein blokkies gesny (moenie te gaar maak nie omdat ŉ bietjie van hul struktuur nodig is)
1 teelepel sout
ŉ Titsie swartpeper
1 teelepel suiker
1/3 koppie bruismeel
2 eetlepels melkpoeier
1 eetlepel sagte botter
1 eier, geklits
Groenteolie vir braai

Meng al die bestanddele liggies saam. Sit in die vrieskas vir ŉ halfuur om ferm te raak. Rol tussen twee velle bakpapier uit totdat die vel ongeveer 1 cm dik is, en bevries dit minstens ŉ uur tot hard. Sit ŉ kastrol met groenteolie op die rooster en maak sissend warm. Haal die bakpapier af, sny sirkels in die aartappelvel uit en sit ŉ paar van hulle op ŉ keer in die olie. Braai tot goudbruin en dreineer op kombuispapier. As jy gereed is om op te dien, braai hulle nog ŉ keer om die buitekant lekker bros te kry.